PAISAXES SUBMARINAS
A disposición xeográfica das Rías Baixas convérteas en zonas resgardadas dos temporais do inverno, algo que aínda é máis notorio na ría de Vigo ao dispor das Illas Cíes como parapeto. Isto permite que podamos desfrutar do mergullo durante todo o ano e que podamos ser testemuñas do paso das estacións baixo o mar.
Aínda que existen interesantes puntos de mergullo no interior da ría, a maioría concéntranse na liña de costa ou nas súas proximidades. Unha franxa entre 1 -20 m que acolle unha enorme variedade de vida.
Dividimos a ría en costa norte, sur e Illas Cíes. Premendo sobre cada zona poderedes acceder a información sobre os puntos de mergullo que alí atopamos e somerxervos neles a través dos nosos vídeos.
BOSQUES DE ALGAS PARDAS
Os bosques de kelp, onde grandes algas pardas que chegan a medir varios metros forman comunidades mestas, son lugares dunha riqueza e biodiversidade enormes. Ao igual ca sucede coas plantas, as algas absorben o dióxido de carbono e xeran osíxeno, actuando como os pulmóns do planeta. Pero o seu maior valor radica na cantidade de vida que acollen ao seu redor.
FONDOS ROCHOSOS POUCO PROFUNDOS
Son os fondos que predominan na líña de costa, baixos que se estenden dando lugar a recunchos e laños que moitas especies aproveitan para vivir ou buscar acocho. Por outra banda, as rochas son o soporte ideal para aquelas formas de vida que precisan superficies duras para suxeitarse, como as algas, anemones, esponxas ou gorgonias. Deste xeito, ao redor das rochas, creanse grandes e diversas comunidades de diferentes animais.
FAROS E BALIZAS
Cualquiera estrutura artificial somerxida rapidamente cóbrese de vida baixo o mar. As balizas non son menos e ao outro lado da superficie congregan numerosas formas de vida que acaban dando lugar a unhas paisaxes moi especiais
PRADARÍAS DE ZOSTERA
A zostera é unha planta mariña que medra nos fondos de area formando mestas alfombras cheas de vida. Pero a súa importancia vai máis alá de ser un lugar de refuxo e busca de alimento para multitude de especies. Estas plantas son quen de captar dióxido de carbono, liberar osíxeno e actúan como unha barrera protectora para a costa frente os temporais e o puxar do mar, xa que amainan o seu impacto.
FONDOS DE AREA
Semellan enormes desertos que se estenden sen fin, mais é o lugar no que habitan multitude de animais adaptados á perfección a esta contorna. Na area non hai acochos, así que a camuflaxe se convirte en algo imprescindible. Hai quen é experta en enterrarse, como raias e chocos, e outros vístense con cores que imitan os da area, como moitos peixes planos.
FONDOS DE MAERL
O maerl é un alga moi especial: en troques de ser branda e flexible, é dura coma unha pedra; e non se aferra ás rocas, senón que vive libremente rodando nos fondos de area. Son seres moi lonxevos, que medran lentamente e forman capas rosas que se estenden sobre a area. Cada alga é unha escultura vivente que adopta unha forma única modelada polas correntes e o rozamento coa area tralo paso dos anos.
VER MÁIS
CAMPOS DE CENOIROS
Os cenoiros son as plumas de mar máis abondosas na ría. Crecen na arena formando amplos campos e poden chegar a medir máis dun metro. Ao seu redor é habitual atopar tiburóns melgacho descansando, grandes congregacións de rañas negras ou os esquivos peces sanmartiño nadando na procura de alimento.
VER MÁIS
XARDÍNS DE ALGAS
En Galicia temos a sorte de poder gozar dunha variedade enorme de algas, que, en multitude de zonas costeiras, forman fondos multicolor. Estes lugares están cheos de vida e tamén son accesibles cando facemos snorkel na praia. Peixes, ourizos, lapas, lesmas de mar, caranguexos, anemones, caramuxos… son só algúns exemplos de todo o que podemos atopar nun paseo por estas paisaxes.
VER MÁIS
CAMPOS DE ANEMONES
Da ampla variedade de anemones que temos nas Rías Baixas, a anemone común (Anemonia viridis) é a raíña, e, en ocasións, forma grandes poboacións que cobren as rochas. Os seus tentáculos son longos e, ao contrario ca maioría das anemones, non pode retraelos no interior do seu corpo. Esta característica aproveitana multitude de animais, que se refuxian dos perigos baixo as súas longas melenas urticantes.
XARDÍNS DE GORGONIAS
As gorgonias moradas son unha das sinais de identidade máis representativas dos fondos galegos. Corais brandos en forma de abanos que, cando as condicións son favorables, forman amplos xardíns que cobren as rochas, actuando como se fose un monte baixo no que se agocha unha abundante cantidade de vida.
FONDOS ROCHOSOS A MÁIS DE 20 METROS
A partir dos 20 metros, a maioría das algas non poden vivir (xa que non dispoñen de suficiente luz para realizar a fotosíntese) e as amplas zonas de rocha que adoitan cubrir quedan á disposición de formas de vida animal que atopan aquí o seu espazo. Cando visitamos estas zonas, sorprendennos formas de vida menos habituais, coma esponxas, gorgonias, ascidias e briozoos con curiosos aspectos e cores que non encontramos a outras profundidades
PECIOS
Os pecios ou barcos afundidos forman arrecifes temporais improvisados. Os restos recóbrense dunha segunda pel viva e serven de gorida a grandes congros e lumbrigantes. Son lugares que xeran unha especial atracción polos seus contrastes e pola historia máis ou menos afortunada que contan estes esqueletos abandonados ao desgaste da forza do mar que acabará por facelos desaparecer.
VER MÁIS
BATEAS
Estas plataformas de cultivo do mexillón crean sorprendentes paisaxes baixo o mar. Entre a multitude de columnas que descenden case ata o fondo, poden verse os xogos de luces e sombras onde os bancos de peixes congréganse na busca de alimento. No fondo, unha enorme estensión de cunchas escuras sepulta a area e provoca a chegada daqueles animais que máis desfrutan de consumir mexillón, as estrelas de mar.
VER MÁIS
A COLUMNA DE AUGA
Non todas as formas de vida elixen o fondo para asentarse, outros tantos deciden facelo na columna de auga que vai dende a superficie ao fondo. Bancos de peixes nadadores, augamares, cetáceos e mesmo algunha especie de caranguexo fan de este enorme espazo a súa casa.
VER MÁIS
A ZONA ENTRE MAREAS
A zona intermareal é a parte da costa que queda ao descuberto cando baixa a marea para volver a inundarse cando esta sube. Un lugar cheo de interesantes criaturas que podemos visitar sen necesidade de somerxernos. Cada día, a vida destas paisaxes debe soportar unhas condicións moi duras e adaptarse a cambios enormes de temperatura, humidade e salinidade. Cousas de vivir no límite entre a terra e o mar.
VER MÁIS
Todas as fotografías, textos e vídeos pertencen ás autoras e están protexidos pola Ley de Propiedade Intelectual. Non se permite o seu uso non autorizado.