É un punto costeiro situado na enseada do Fornelo que permite seguir as rochas do litoral e tamén dispón dunha zona areosa con extensións de zostera. O mergullo é sinxelo e pouco profundo, cun fondo entre 8 e 9 m.

A ruta irregular da costa presenta moitos buratos entre as rochas nos que atopar diferentes crustáceos, como nécoras, centolas, galateas ou camaróns, así como peixes de fondo entre os que destacan os lorchos e os peixes planos. Os equinodermos tamén son abundantes, especialmente as estrelas e os carallotes. A finais do inverno e na primavera tamén aparecen as borrachas.

​

É un dos mellores puntos de mergullo, xunto con Fornos, para admirar unha ampla variedade de algas. Laminarias, xunto con outras algas pardas, verdes e vermellas, cobren a parte das rochas máis próximas á superficie, con grandes espirógrafos que as acompañan.
Serráns e farros nadan xunto a xuvenís de sargos e fanecas, e non é raro atopar pequenos polbos, congros ou centolas.

​

Nas zonas areosas e de zosteras é común atopar chocos, melgachos e peixes pipa. É un dos lugares de mergullo onde, con algo de sorte, podes ver cabalos de mar.
Tamén é unha boa zona para practicar snorkel.